Rekstur sveitarfélaga er ekkert frábrugðinn rekstri fyrirtækja hvað varðar kröfu um hagkvæmni og ábyrgð stjórnenda. Stöðug rýni til gagns og skoðun á því hvernig okkur er að ganga er sjálfsögð krafa í umhverfi stöðugra breytinga og þróunar. Við eigum að vera óhrædd við að gera breytingar á þjónustunni og forgangsraða í takti við þarfir íbúa hverju sinni. Þá eigum við að vera öflugur málsvari bæjarins gagnvart ríkinu og krefjast sambærilegra framlaga til þjónustu á forræði ríkisins og veitt eru sambærilegum sveitarfélögum. Við ráðstöfun á fjármagni sveitarfélagsins þarf að bera  virðingu fyrir því að verið sé að ráðstafa fjármunum bæjarbúa. 

Við boðum breytingar í stjórnsýslunni

• Gerum skýra kröfu um hagkvæman rekstur þar sem sjálfsagt þykir að spyrja reglulega hvort gera megi betur
• Komum á og eigum reglulega samráðsfundi með íbúum allra hverfa
• Styðjum við stjórnendur sveitarfélagsins og aukum ábyrgð þeirra á að árangur náist
• Rýnum stöðugt hvar er hægt að gera betur og með hagkvæmari hætti
• Lítum til fjölgunar stöðugilda með gagnrýnum hætti, skilgreinum skýr markmið með hverri nýrri stöðu og skýrt hlutverk sem tengja má aukinni þjónustuþörf íbúa.
• Tryggjum gagnsæi í stjórnsýslunni m.a. með auknu aðgengi að rafrænum upplýsingum um stöðu mála og erinda. 
• Einföldum og samræmum stafrænar þjónustuleiðir Reykjanesbæjar

Við boðum breytingar í fjármálastjórnun

• Vinnum ötullega að því að auka tekjur í takti við önnur sveitarfélög, án hækkunar skatta
• Lækkum fasteignaskatta og skoðum breytingar á lóðaleigu
• Vöndum vinnu við fjárhagsáætlun þannig að hún endurspegli í raun þau verkefni sem ráðast þarf í á tímabilinu en kalli ekki á augljós aukaframlög. 
• Stýrum af festu verklegum framkvæmdum og leggjum áherslu á góðan undirbúning áður en hafist er handa.

Við boðum breytingar í samskiptum við ríkið

• Beitum okkur fyrir því að ríkisfyrirtæki hafi höfuðstöðvar sínar í Reykjanesbæ
• Vinnum að því að byggð verði ný lögreglustöð í Reykjanesbæ
• Tryggjum nægjanlegt fjármagn til stofnana ríkisins í sveitarfélaginu
• Semjum við ríkið um lóðaleigu á Ásbrú 

Við boðum breytingar í heilbrigðisþjónustu

• Fáum einkarekna heilsugæslu til Reykjanesbæjar 
• Stöndum með HSS í að berjast fyrir að sambærilegt fjármagn renni til HSS og annarra heilbrigðisstofnana
• Öxlum ábyrgð og tölum máli íbúa sveitarfélagsins gagnvart ríkinu er varðar heilbrigðisþjónustu á svæðinu 
• Vinnum með HSS í að því að efla traust til stofnunarinnar 
• Aukum samstarf á milli stjórnenda Reykjanesbæjar og HSS
• Beitum okkur fyrir því að sem víðtækust heilbrigðisþjónusta sé í boði innan sveitarfélagsins